• Home
  • /Emil Hjörvar Petersen

Emil Hjörvar Petersen

Hver er ég?

Ég ólst upp í Kópavogi, byrjaði að skrifa frekar snemma, lærði bókmenntafræði og ritstjórn og útgáfu í háskóla, og hef starfað við ýmislegt. Árið 2009 fluttist ég ásamt unnustu minni til Lundar í Svíþjóð þar sem ég hef helgað mig ritstörfum og útgáfu. Saman eigum við tvö lítil börn sem heita Ronja Áskatla og Þrándur Alvar. Sem stendur er ég svo lánsamur að geta sinnt ritstörfum og tengdum verkefnum í fullu starfi.

Ég hóf rithöfundaferilinn með útgáfu tveggja ljóðabóka með árs millibili: Gárungagap og Refur (Nykur, 2007 og 2008). Bækurnar hlutu góðar viðtökur, góða dóma og mér voru veittir nokkrir styrkir.

Þá hóf ég að skrifa mitt stærsta verk hingað til, sem ég hafði verið með í maganum í nokkur ár: þríleikinn Sögu eftirlifenda. Skáldsögurnar þrjár (Höður og Baldur, Heljarþröm og Níðhöggur) komu út undir merkjum höfundaforlagsins Nykurs á árunum 2010-2014. Viðtökur hafa verið framar vonum, sagan hefur vakið töluverða athygli og verið lesefni í framhaldsskólum og Háskóla Íslands.

Þriðja ljóðabókin mín, Ætar kökuskreytingar, kom út hjá Meðgönguljóðum (Partus Press) árið 2014, auk þess sem bókin Refur var gefin út í Úkraínu hjá Krok Publishers.

Ég hef lesið upp víðast hvar og verið virkur fyrirlesari um bókmenntir og skapandi skrif bæði hérlendis og erlendis. Hef til dæmis unnið með Reykjavík Bókmenntaborg UNESCO, skrifað greinar í bókmenntatímarit, fengið allmarga styrki sem tengjast ritstörfunum, hannað og skrifað námsefni fyrir skóla, verið gestahöfundur á ráðstefnum erlendis og margt fleira. Mér var boðið að vera einn af íslensku höfundunum á Bókmenntahátíð í Reykjavík 2015. Ég er einn af skipuleggjendum Icecon: furðusagnahátíðar á Íslandi. Og fleira.

Í október 2016 kom út hjá Veröld nýjasta skáldsagan mín, Víghólar. Hún gerist í sagnaheimi sem ég byrjaði að þróa meðfram skrifum á síðustu bók þríleiksins; sagnaheimi sem byggir á hliðstæðu Íslandi þar sem heimar vættanna eru raunverulegir en afar fáir geta sett sig í tengsl við þá. Segja má að sagan sé blanda af fantasíu, sakamálasögu og íslensku raunsæi. Aðalpersónurnar eru mæðgurnar Bergrún og Brá, staurblankur miðill og rótlaus dóttir hennar. Viðtökurnar hafa verið gríðarlega góðar, bókin fékk einróma lof gagnrýnenda og Sagafilm þróar nú sjónvarpsþáttaröð eftir henni. Hér má lesa meira um bókina.

Í október næstkomandi, 2017, kemur út sjálfstætt framhald: Sólhvörf. Meira um það ögn síðar.

Þessa stundina vinn ég að þriðju skáldsögunni um mæðgurnar. Ásamt því vinn ég að nokkrum smásögum, tölvuleikjabók og fleira.